相信大家對「移民」呢兩個字都唔陌生，或者身邊甚至仲有朋友仔已經離開咗香港，搬去其他地方生活。咁但係大家又有冇諗過移民潮會為香港帶嚟咩問題呢？
早前，香港總商會公布咗「人才短缺調查2023」嘅結果，總共196間受訪企業入面，有74%指佢哋面對緊人才短缺問題，當中仲有六成受訪企業話呢個情況維持咗成一至三年咁多添呀！
疫情前，香港勞動人口高峰期大約有400萬人，而家跌到得370萬人左右。到底點解會突然少咗咁多人呢？參考調查結果，香港人才流失其實受唔同因素影響，而其中最主要嘅原因係尋求更高嘅薪酬（79%），緊接其後嘅就係移民（70%） 同尋求工作與生活平衡（51%）喇。睇嚟除咗香港人對生活質素嘅追求上升之外，移民潮對勞動人口嘅影響都唔可以睇少！
咁有咩方法可以紓緩勞動人口短缺嘅問題呢？短期嚟講，唔少受訪企業都贊成政府去放寬現有輸入人才計劃嘅申請資格同精簡程序，喺外地同大灣區輸入人才解決燃眉之急；長遠嚟講，受訪企業就希望政府可以出多啲力喺培養本地人才同完善政策方面，咁先可以真真正正阻止到香港嘅人才流失至其他地方。
數據及資料來源: HKGCC Talent Shortage Survey 2023
發表迴響