HK Bizwire Magazine 商業提案雜誌

香港人力資源管理學會同Jobsdb by SEEK合作，就企業2028年對人力資源需求嘅變化，喺今年4月至6月期間向來自20個唔同行業嘅300間公司進行網上調查，分析同預測未來勞動力嘅趨勢及其背後影響因素。

研究顯示現時企業職缺情況有好轉，認為填補職缺「極度困難」的企業比例由3月嘅 28%降至16%。團隊推測係源於香港勞動力嘅增長，以及政府更進一步推動引入海外人才計劃，令僱主可以有更多選擇。團隊亦預計2028年香港人力資源會增長2%，企業對資訊科技行業嘅人才需求尤其高。

不過，即使未來企業對人力資源嘅需求上升，對於部分打工仔嚟講都未必會易啲搵到工。隨住科技進步同AI普及化，現時有各種AI生成工具可有助處理日常文書工作，故企業對傳統職位嘅人才需求有大幅下降嘅趨勢。有71%企業預計未來對行政/文書行業嘅職位需求下降、10%企業對客戶服務、會計 、人力資源行業嘅僱員需求將減少，亦有9%企業表示對營運相關職位嘅員工需求會變低。

Jobsdb by SEEK 香港區總經理李政勳先生建議各位打工仔時刻關注市場所需，發展多元技能以提升自己喺搵工市場上嘅競爭力。